O alcalde, Manu Lourenzo, deu a benvida hoxe aos 10 novos operarios e operarias que se suman ao persoal de vías e obras ata o mes de setembro no concello de Soutomaior.

17 de marzo, Soutomaior. Hoxe se incorporaron 10 novas persoas ao cadro de persoal de vías e obras do Concello de Soutomaior, e o alcalde Manu Lourenzo, doulle a benvida a todas e todos eles.

As novas incorporacións son 6 peóns forestais, 2 varredoras e 2 albaneis. Unha contratación que se realiza dende o concello de Soutomaior ao abeiro do Programa +Provincia para a activación do emprego da Deputación Provincial

Con este procedemento, realizado con total transparencia e en igualdade de condicións, Soutomaior incorporará entre mes de marzo e o mes de maio case un vintena de persoas a cadro municipal para realizar mantementos e limpeza de rúas no concello.

A maiores o Concello tamén oferta un posto de auxiliar administrativo e outro para auxiliar da biblioteca que se incorporarán o 1 de abril.

Este proceso de contratación pública está marcado en todo momento pola transparencia impulsada polo Goberno de Soutomaior. Así, a finais de xaneiro o Goberno local fixo públicos nas oficinas, nas redes sociais e nos medios de comunicación os códigos que os veciños que así o quixeran tiveron que presentar na Oficina de Emprego para poder optar ás prazas. Trátase do segundo ano consecutivo que o Goberno de Soutomaior publica estes códigos para que todos os veciños e veciñas estivesen en igualdade de condicións. Unha iniciativa que antes do comezo do actual mandato non se viña facendo. Unha rematado o prazo de presentación de candidaturas, a Oficina de Emprego realizou de maneira independente unha primeira escolla de candidaturas para cada unha das prazas ofertadas. A Oficina de Emprego manda este listado ao Concello de Soutomaior, que se encarga de solicitar ás persoas que opten ás prazas a documentación requirida. Unha vez entregada e confirmada que toda está en orde, as persoas candidatas tiveron que realizar unhas probas de aptitude que foron avaliadas por un tribunal independente sen relación algunha co Goberno de Soutomaior.

A partir dese momento a incorporación do persoal de rúa realizase de maneira escalonada co obxectivo de que haxa persoal a maior parte do ano, e que nos meses de maior necesidade, o concello conte coa totalidade das persoas contratadas de maneira activa. Deste xeito hoxe comezaron 10 persoas ás que se sumarán no mes de maio 4 peóns forestais, 2 varredoras e 1 albanel. Así, nos meses de verán, a cuadrilla de obras municipal estará integrada por preto de 20 persoas que se encargarán de manter o concello limpo e en boas condicións.

O alcalde de Soutomaior, Manu Lourenzo, sinalou que “Soutomaior traballa para ter a mellor cuadrilla de obras da súa historia, co obxectivo de manter os nosos barrios limpos e como merece a nosa veciñanza. Todo isto a través dun proceso de contratación realizado con total transparencia e en igualdade de condicións. Así é como se constrúe un Soutomaior que avanza en todos os ámbitos e que está á altura da nosa veciñanza”

Esta mañá a secretaria do concello de Soutomaior recibiu a obra, cunha visita na que estiveron presentes o equipo redactor, o Goberno Local e tamén a empresa de Construcións Castro, encargada de realizar estes traballos

Soutomaior, 13 de marzo. O Goberno de Soutomaior vén de recibir hoxe a obra de transformación da praza da Carreira dos Bolos do barrio da Pedreira. Unha importante actuación na que o Goberno local inviste preto de 200 mil euros no rural de Soutomaior ao abeiro do Plan Concellos da Deputación Provincial.

Soutomaior aposta por un modelo de transformación urbana e rural que mellore a calidade das veciñas e veciñas. Tal e como dixo nesta xornada o alcalde, Manu Lourenzo, “en Soutomaior témolo todo para contar cun rural que fixe poboación e sexa unha referencia de calidade de vida e de mobilidade”. Ao que Lourenzo engadiu que “dende o Goberno local facemos aposta forte polo rural con proxectos como este que acabamos de finalizar, a mellora e humanización do Val Sobral, as melloras de camiños e espazos veciñais, dos campos de fútbol e cun proxecto importantísimo para a transformación do noso concello como é o ecoparque empresarial”.

Lourenzo ten claro que “Soutomaior agora mesmo funciona grazas a unha xestión económica que nos permite facer investimentos como nunca, algo que é posible grazas ao traballo man a man do Goberno cos funcionarios e veciñanza do concello”.

O proxecto finalizado nesta xornada e deseñado polo estudo Cendón-Vázquez Arquitectos, trae consigo traballos na contorna da praza da Pedreira,  humanizando e modernizando os espazos que a conforman. Ademais, as obras tamén compren o obxectivo de recuperar a esencia tradicional deste espazo no que hai décadas os veciños e veciñas do barrio xuntábanse para xogar aos bolos celtas.