Este selo nace dunha petición do Concello de Soutomaior para homenaxear a escritora, intelectual e activista, pioneira na defensa dos dereitos das mulleres    

Soutomaior, 7 de outubro. O Castelo de Soutomaior acolleu hoxe a presentación do selo de Correos dedicado a María Vinyals, coincidindo coa súa posta en circulación. A emisión deste selo nace dunha petición formulada polo Concello de Soutomaior a Correos para homenaxear a figura dunha muller pioneira no ámbito da cultura, o activismo social e a defensa dos dereitos das mulleres, que naceu neste castelo en 1875.

O acto contou coa participación do alcalde de Soutomaior, Manu Lourenzo; o subdelegado do Goberno en Pontevedra, Abel Losada; a concelleira de Turismo, Cultura e Memoria Histórica, Silvia Cernadas; e a directora de Filatelia e Relacións Institucionais de Correos, Nuria Lera.

A presentación contou tamén cunha destacada proposta artística. Lorena Reinaldo e Ariel García, integrantes do dúo de arpa e guitarra, puxeron a banda sonora ao acto con música en directo, tanto ao inicio como ao remate da xornada.

De xeito paralelo ao desenvolvemento do acto, a artista Alba Troiteiro, mediante a técnica de storytelling, foi capturando a esencia, as emocións e as mensaxes clave da xornada para transformalas nunha peza artística en tempo real. Unha ollada creativa destinada a recoller de forma visual e perdurable a historia que se está a escribir arredor da figura de María Vinyals e que dará como resultado unha postal artística como lembranza desta xornada.

O selo forma parte da serie Literatura, ten un valor de 2 euros e unha tirada de 65.000 exemplares. Pode adquirirse nas oficinas de Correos, a través de Correos Market, contactando co Servizo Filatélico no correo atcliente.filatelia@correos.com ou no teléfono 915 197 197.

Durante o acto realizouse o tradicional mataselado de honra, reivindicando a figura de María Vinyals e a súa vinculación con Soutomaior.

O alcalde de Soutomaior, Manu Lourenzo, destacou que “María Vinyals merecía ter o recoñecemento que durante tantos anos non tivo. Esta petición nace coa vontade de que a súa figura se coñeza e se recoñeza máis alá de Soutomaior. Hoxe o seu nome e a súa imaxe van viaxar por todo o mundo”.

Pola súa banda, a concelleira de Turismo, Cultura e Memoria Histórica, Silvia Cernadas, sinalou que “María Vinyals forma parte do noso patrimonio e da nosa memoria colectiva, por iso, dende o concello de Soutomaior, presentamos esta petición a Correos. Foi unha muller adiantada ao seu tempo, que destacou na literatura, nas artes, no xornalismo e na defensa dos dereitos das mulleres. Este selo axúdanos a que a súa historia deixe de ser invisible e chegue a novas xeracións”.

María Vinyals, unha muller adiantada ao seu tempo

María Vinyals e Ferrés foi escritora, xornalista, artista e activista. Coñecida como a “Marquesa Vermella” polas súas ideas progresistas, defendeu a educación feminina, a igualdade de dereitos e o sufraxio universal.

Entre as súas obras figura El Castillo del Marqués de Mos en Sotomayor (1904) e a novela autobiográfica Rebelión (1905), publicada baixo o pseudónimo Joyzelle. Foi tamén presidenta do Centro Iberoamericano de Cultura Popular Femenina, académica non numeraria da Real Academia Galega e membro do Ateneo de Madrid.

A súa figura estivo estreitamente vinculada ao Castelo de Soutomaior, onde viviu e onde, xunto ao médico e intelectual cubano Enrique Lluria Despau, impulsou o Hotel-Sanatorio Lluria, convertendo o castelo nun punto de encontro de destacadas personalidades da cultura e da sociedade da época.

O novo selo contribúe así á recuperación e difusión da memoria de María Vinyals, facendo que o seu nome e a súa historia estean presentes desde hoxe na filatelia e circulen por todo o mundo.