ARTELLANDO, SOUTOMAIOR IMPULSA A CULTURA

O Concello de Soutomaior pon en marcha o programa de dinamización sociocultural ARTELLANDO, Soutomaior impulsa a cultura, que pretende poñer en valor a arte e a cultura, centrándose no local, para visibilizar a capacidade, destreza, talento e experiencia dos artistas locais pero tamén achegar a arte e a cultura ao público a través dunha metodoloxía lúdica, participativa e inclusiva. O programa articulará distintas propostas a través de liñas de actuación de diversa índole. Partiremos do seguintes tres liñas de actuación:

A primeira liña de actuación é o Banco do Tempo Cultural, que consiste na creación dun banco do tempo co que facilitar espazos de estar, onde as persoas poidan compartir o seu tempo e as súas capacidades (artísticas, musicais, creativas etc.) de forma solidaria.

A segunda liña de actuación é o Rexistro de Artistas Locais, que pretende poñer en marcha o rexistro de artistas locais que dará como resultado un catálogo de artistas locais de todas as disciplinas para a súa difusión e promoción.

A terceira liña de actuación é a Experiencia Artística, que terá como obxectivo promover as artes plásticas e visuais a través da vivencia de experiencias participativas da man dos líderes locais a través de exposicións e talleres.

LIÑA DE ACCIÓN 1: Banco do Tempo Cultural

DESCRICIÓN

Trátase dunha iniciativa cultural e sociocomunitaria na que se intercambia tempo, que simbólicamente emula o funcionamento dun banco, pero na que o que se “presta” e “recibe” é tempo dedicado ás persoas. Neste caso no ámbito da cultura.

Baséase na confianza, na solidariedade e o intercambio altruísta para o restablecemento do tecido social e cultural, superando o individualismo e a desconfianza para volver á comunidade.

Non é unha rede directa de intercambio entre dúas persoas, senón unha rede comunitaria na que cada un ofrece e demanda unha actividade e na que se compromete a dar e recibir para formar grupos con intereses similares.

OBXECTIVOS

Os obxectivos desta liña son promover valores que permitan:

  • Construír unha comunidade estable.
  • Valorar o talento.
  • Axudar á veciñanza para coñecerse entre si.
  • Intercambiar habilidades.

LIÑA DE ACCIÓN 2: Rexistro de Artistas Locais

DESCRICIÓN

Co fin de recoñecer o labor de persoas e entidades que potencian a cultura e a arte do territorio, teceremos esta rede de artistas, profesionais e/ou afeccionados.

Queremos que este rexistro sexa un recoñecemento ao seu traballo pero tamén unha plataforma que promova e dea visibilidade ás experiencias dos creadores, tanto a nivel individual como colectivo.

Trátase dunha base de datos que tamén servirá para fomentar a contratación de grupos e creadores/as locais por parte de organizadores de eventos culturais ou doutra índole porque ou catálogo resultante será público (mantendo a privacidade de certos datos). A el poderán acceder todas as persoas interesadas. Editarase na Web municipal onde estará permanentemente actualizado e tamén en papel.

OBXECTIVOS

  • Poñer en valor e promover a cultura e artistas locais.
  • Editar un catálogo de artistas locais.
  • Impulsar a cultura como elemento vertebrador de comunidade.
  • Fomentar as experiencias artísticas de diversa índole, en calquera disciplina e achegalas ao público xeral.

ARTELLANDO: Banco do Tempo Cultural

As propostas de actividades serán voluntarias e non terán remuneración nin cotas porque o que se intercambia é o tempo que cada persoa quere compartir con outras persoas e, viceversa. Nese tempo, compartimos unha habilidade, coñecemento ou interese (música, lectura, idiomas, informática, manualidades, historia, paseos, etc.).

O Concello de Soutomaior canaliza este intercambio xestionando as propostas e facilitando a inscrición das persoas nas actividades.

Para isto, habilita na Web un formulario de inscrición de propostas e un formulario de inscrición nas actividades que se vaian recibindo e publicando. Sempre terá que haber un intercambio entre as persoas que participan.

  • No formulario de propostas pediranse: datos da persoa,  título da actividade, breve descrición, horarios, duración, lugar de desenvolvemento, idade de participantes, tipo de instalación, número de participantes.
  • No formulario de inscrición en actividades pediranse datos persoais básicos, razóns polas que se participa no Banco e que habilidade poderían compartir.

Para o funcionamento desta liña o Concello de Soutomaior disporá de instalacións municipais acordes ás necesidades do tipo de actividades (sempre e cando sexa viable no momento no que se soliciten e se cumpran as obrigas establecidas para cada caso concreto).

PERSOAS DESTINATARIAS

Todas as persoas empadroadas no Concello de Soutomaior que teñan tempo e queiran compartir algunha habilidade con outras persoas.

PRAZO

O prazo de inscrición estará aberto de forma continuada.

FUNCIONAMENTO E CRONOGRAMA DA LIÑA DE ACCIÓN 1

O Banco comezará a funcionar en novembro de 2022 trala publicación das bases e da posta en fucionamento dos formularios de inscrición.

A medida que se vaian recibindo as propostas, valoraranse para elaborar o catálogo de actividades que se publicará na Web para que as persoas interesadas poidan anotarse.

  • Presentar todos os documentos con datos reais.
  • De faltar algún documento no expediente, será requirido.
  • Só se procederá á inscrición daquelas actividades que cumpran os requisitos.
  • Informar ao Concello de calquera modificación relativa aos seus datos que poidan ser relevantes (persoa contacto, teléfono, enderezo, etc.).

PUBLICACIÓN DE ACTIVIDADES

Poderase acceder de forma telemática na web soutomaior.gal

ARTELLANDO: Rexistro de Artistas Locais

Creación dun rexistro de artistas locais e edición do catálogo con fichas de cada artista e/ou colectivo no que se identifique a disciplina e características da súa obra e/ou espectáculo.

No Catálogo poderase acceder á ficha básica de datos de artistas/grupos.

PERSOAS DESTINATARIAS/GRUPOS

Poderán inscribirse artistas locais que estén empadroadas/os ou que teñan a súa residencia ou sede no termo municipal de Soutomaior e poidan acreditalo; Tamén os grupos nos que na súa composición haxa algunha persoa que estea empadroada no termo municipal de Soutomaior.

NOTA:
Se non reúnes este requisito de empadroado/a e es un artista dalgún dos Concellos limítrofes (Vilaboa, Ponte Caldelas, Fornelos, Redondela, Pazos de Borbén) envíanos un correo a omix@soutomaior.gal  no que nos indiques o teu interese por formar parte deste rexistro e porémonos en contacto contigo para estudar a túa solicitude.

INSCRICIÓNS

As inscricións faranse en liña na web soutomaior.gal

  • No caso de colectivos, será asinada pola persoa que represente o grupo.
  • No caso de artistas menores de idade, será asinada polo pai/nai/titor/titora legal do menor e no caso de grupos será asinada por unha persoa adulta que os represente legalmente.

DOCUMENTACIÓN

Todos aqueles colectivos ou persoas físicas que desexen inscribirse deberán achegar a seguinte documentación ao correo omix@soutomaior.gal

  • Copia DNI de representante (maior de idade).
  • Documentos dixitais (fotografías, vídeos, gravacións…).
  • Resumo explicativo da traxectoria e actividade que se desenvolve.
  • Calquera outro documento relacionado coa actividade, e que poida aportar ou aclarar información acerca dela.
  • Presentar todos os documentos requiridos para a inscrición e inclusión no Catálogo de Artistas Locais con datos reais.
  • De faltar algún documento no expediente, será requirido.
  • Só se procederá á inscrición de artistas e grupos, unha vez que o expediente estea completo.
  • Informar ao Concello de calquera modificación relativa aos seus datos que poidan ser relevantes (persoa contacto, teléfono, enderezo, etc.).
  • Darse de baixa no rexistro cando cese a súa actividade cultural enviando comunicación ao correo omix@soutomaior.gal
CATEGORÍAS. CLASIFICACIÓN DE PARTICIPANTES.

As inscricións rexistradas serán divididas en tres grandes bloques, segundo a natureza artística, quedando o Programa fraccionado en:

Cultural musical:

  • Bandas de música.
  • Grupos de baile e música tradicional, de gaitas, pandereteiras.
  • Grupos musicais en xeral (pop, rock, ska, clásica, folk…).
  • Solistas e cantautores/as.
  • Coros e masas corais.
  • Grupos de danza e baile moderno, ballet…
  • Calquera outro que se englobe dentro desta categoría.

Cultural de artesáns e creadores/as:

  • Artesáns/artesás que dispoñan da carta de artesán.
  • Creadores de diversa índole (pintura, escrita, poesía, traballos manuais,..) que non dispoñan de carta de artesán/á.

Cultural artistas xerais: recollerá artistas artes escénicas e outros:

  • Grupos de teatro, actrices, actores.
  • Monicreques.
  • Grupos de animación infantil, clowns e novo circo.
  • Magos/as.
  • Humoristas.
  • Calquera outro que se englobe dentro desta categoría.

O prazo de inscrición estará aberto de forma continuada.

FUNCIONAMENTO E CRONOGRAMA DA LIÑA DE ACCIÓN 2

O Rexistro de artistas locais comezará a funcionar en novembro de 2022. O catálogo en Web poderá consultarse a medida que recibamos solicitudes e unha vez formalizadas e valoradas as vaiamos incorporando. Actualizarase a medida que haxa novas incorporacións e modificacións nos datos.

PUBLICIDADE DO PROGRAMA

As Bases do programa e das correspondentes liñas de acción serán publicadas na web soutomaior.gal para a súa difusión e publicidade.

As actividades do banco do tempo, o calendario de exposicións e obradoiros, así como o catálogo de artistas tamén se consultará a través da web anterior.

Todas as actividades difundiranse a través das redes sociais do Concello e a través do servizo de WhatsApp da Axenda Municipal.

VALORACIÓN DE PROPOSTAS PRESENTADAS

O Concello de Soutomaior valorará a través do servizo da OMIX as propostas presentadas tendo en conta criterios de viabilidade acordes á filosofía do programa e das bases de cada liña de acción.

PRIVACIDADE DE DATOS

Os servizos prestados a través deste Programa están dirixidos a todas as persoas que presenten as características nel expostas.

No caso de menores de 18 anos, requirirase que a solicitude sexa asinada por unha persoa maior de idade (pai/nai/titor/titora).

Ao cumprimentar o formulario de solicitudes, a persoa interesada comprométese a facilitar datos reais e autoriza o tratamento automatizado dos datos persoais que voluntariamente subministraron, e que son necesarios para a prestación do servizo. Os datos persoais recollidos serán incorporados e tratados ás bases da datos de cuxo ficheiro será responsable o Concello de Soutomaior.

ACEPTACIÓN DAS BASES

A participación nas liñas deste Programa supón a aceptación das bases así como de calquera outra norma que sexa estipulada polo Concello para o bo funcionamento do Programa Artellando.